wo sang-dil mera rahbar hai kya kiya jae

vo sañg-dil mirā rahbar hai kyā kiyā jaa.e

aur us ke haath meñ ḳhanjar hai kyā kiyā jaa.e

mire buzurgoñ ke sar par humā kā saaya thā

ye aaj ġhairoñ ke sar par hai kyā kiyā jaa.e

ye holī us ne jo khelī hai ātish-o-ḳhūñ kī

safīr-e-amn bhī shashdar hai kyā kiyā jaa.e

uḌeñgī dhajjiyāñ phir amn kī ki vo zālim

khaḌā huā sar-e-mimbar hai kyā kiyā jaa.e

ye taḳht-o-tāj ye mahloñ kā kal jo vaalī thā

vatan meñ apne hī be-ghar hai kyā kiyā jaa.e

batāo kaise jalā.ūñ maiñ sham.a ulfat kī

ki tez buġhz kī sarsar hai kyā kiyā jaa.e

'zakī' vo apnī safā.ī meñ ḳhvāh kuchh bhī kahe

gumān merā barābar hai kyā kiyā jaa.e

vo jis ne ḳhuun se sīñchā thā is chaman ko 'zakī'

ḳhilāf us ke hī mahzar hai kyā kiyā jaa.e

wo sang-dil mera rahbar hai kya kiya jae

aur us ke hath mein KHanjar hai kya kiya jae

mere buzurgon ke sar par huma ka saya tha

ye aaj ghairon ke sar par hai kya kiya jae

ye holi us ne jo kheli hai aatish-o-KHun ki

safir-e-amn bhi shashdar hai kya kiya jae

uDengi dhajjiyan phir amn ki ki wo zalim

khaDa hua sar-e-mimbar hai kya kiya jae

ye taKHt-o-taj ye mahlon ka kal jo wali tha

watan mein apne hi be-ghar hai kya kiya jae

batao kaise jalaun main shama ulfat ki

ki tez bughz ki sarsar hai kya kiya jae

'zaki' wo apni safai mein KHwah kuchh bhi kahe

guman mera barabar hai kya kiya jae

wo jis ne KHun se sincha tha is chaman ko 'zaki'

KHilaf us ke hi mahzar hai kya kiya jae