wo sanglaKH zaminon mein sher kahta tha

vo sañglāḳh zamīnoñ meñ sher kahtā thā

ajiib shaḳhs thā khiltā gulāb jaisā thā

sulagte jism pe mere guloñ kā saaya thā

tire vajūd kā vo lams kitnā mahkā thā

jo āshnā the bahut ajnabī se lagte the

vo ajnabī thā magar āshnā sā lagtā thā

parind shaam Dhale ghoñsloñ kī samt chale

charāġh jalte hī us ko bhī lauT aanā thā

usī daraḳht ko mausam ne be-libās kiyā

maiñ jis ke saa.e meñ thak kar udaas baiThā thā

hamāre gird vahī āhanī salāḳheñ haiñ

siyāh raat kā kaTnā to ek dhokā thā

charāġh donoñ kināroñ ke bujh ga.e 'sāġhar'

hamārī raah meñ haa.el lahar kā dariyā thā

wo sanglaKH zaminon mein sher kahta tha

ajib shaKHs tha khilta gulab jaisa tha

sulagte jism pe mere gulon ka saya tha

tere wajud ka wo lams kitna mahka tha

jo aashna the bahut ajnabi se lagte the

wo ajnabi tha magar aashna sa lagta tha

parind sham Dhale ghonslon ki samt chale

charagh jalte hi us ko bhi lauT aana tha

usi daraKHt ko mausam ne be-libas kiya

main jis ke sae mein thak kar udas baiTha tha

hamare gird wahi aahani salaKHen hain

siyah raat ka kaTna to ek dhoka tha

charagh donon kinaron ke bujh gae 'saghar'

hamari rah mein hael lahar ka dariya tha