wo shajar kya jo pur-samar na hua

vo shajar kyā jo pur-samar na huā

dil vo kyā jis meñ terā ghar na huā

bebasī bhī ajiib aalam hai

hausla koī bārvar na huā

dasht-e-vahshat meñ ek bhī na milā

rāsta jo ki pur-ḳhatar na huā

fasl-e-gul aa.ī bhī to kab aa.ī

jabki baazū meñ koī par na huā

pesh rahtā hai ab tasavvur-e-yār

dard-e-dil de ke be-ḳhabar na huā

milnā kaisā ki yaad bhī na kiyā

mere nāloñ kā kuchh asar na huā

dosh taqdīr kā hī phir niklā

ḳhat jo likkhā to nāma-bar na huā

ye bhī achchhā huā ki tū aa kar

merī mayyat pe nauhagar na huā

apnī qismat ko aazmā letā

kyā kahūñ us kā sang-e-dar na huā

sozish-e-ġham se ab kahāñ aañsū

un kā dāman bhī aaj tar na huā

rasm-e-ulfat bhī ek gahrā raaz

koī bhī is se bā-ḳhabar na huā

zulm kab tak bhalā sahe un ke

ek patthar huā jigar na huā

aisī likkhī ġhazal ki yāroñ se

lafz koī idhar udhar na huā

mar-miTe jis ke ishq meñ 'sayyāf'

vo hī afsos bā-ḳhabar na huā

wo shajar kya jo pur-samar na hua

dil wo kya jis mein tera ghar na hua

bebasi bhi ajib aalam hai

hausla koi barwar na hua

dasht-e-wahshat mein ek bhi na mila

rasta jo ki pur-KHatar na hua

fasl-e-gul aai bhi to kab aai

jabki bazu mein koi par na hua

pesh rahta hai ab tasawwur-e-yar

dard-e-dil de ke be-KHabar na hua

milna kaisa ki yaad bhi na kiya

mere nalon ka kuchh asar na hua

dosh taqdir ka hi phir nikla

KHat jo likkha to nama-bar na hua

ye bhi achchha hua ki tu aa kar

meri mayyat pe nauhagar na hua

apni qismat ko aazma leta

kya kahun us ka sang-e-dar na hua

sozish-e-gham se ab kahan aansu

un ka daman bhi aaj tar na hua

rasm-e-ulfat bhi ek gahra raaz

koi bhi is se ba-KHabar na hua

zulm kab tak bhala sahe un ke

ek patthar hua jigar na hua

aisi likkhi ghazal ki yaron se

lafz koi idhar udhar na hua

mar-miTe jis ke ishq mein 'sayyaf'

wo hi afsos ba-KHabar na hua