wo shaKHs bahut karb se kahta tha yahi baat

vo shaḳhs bahut karb se kahtā thā yahī baat

is shahr kī vahshat se to achchhe the mazāfāt

in saare jhameloñ se maiñ vāqif huuñ azal se

dikhlā na mujhe hijr kī ye kashf-o-karāmāt

tum shauq se aa.e ho magar zehn meñ rakhnā

maiñ dasht huuñ aur dasht meñ hotī nahīñ barsāt

bastī meñ koī ḳhauf panap saktā nahīñ hai

al-hamd ki maujūd qabīle meñ haiñ sādāt

jiine kī riyāzat meñ samay kaaT rahe haiñ

ham logoñ kī duniyā meñ na din hai na koī raat

kartā hai talāsh apnī hī marzī se dīvāne

ye ishq hai is kā hai qabīla na koī zaat

darvesh kī duniyā meñ faqat sabr-o-razā hai

darvesh talab kartā nahīñ koī maqāmāt

ye peḌ tirī yaad se sarsabz huā hai

jhaḌ sakte nahīñ is ke kisī taur kabhī paat

maiñ kaaT chukā hijr bahut shauq se 'jāmī'

māñgī nahīñ ik pal bhī tire vasl kī ḳhairāt

wo shaKHs bahut karb se kahta tha yahi baat

is shahr ki wahshat se to achchhe the mazafat

in sare jhamelon se main waqif hun azal se

dikhla na mujhe hijr ki ye kashf-o-karamat

tum shauq se aae ho magar zehn mein rakhna

main dasht hun aur dasht mein hoti nahin barsat

basti mein koi KHauf panap sakta nahin hai

al-hamd ki maujud qabile mein hain sadat

jine ki riyazat mein samay kaT rahe hain

hum logon ki duniya mein na din hai na koi raat

karta hai talash apni hi marzi se diwane

ye ishq hai is ka hai qabila na koi zat

darwesh ki duniya mein faqat sabr-o-raza hai

darwesh talab karta nahin koi maqamat

ye peD teri yaad se sarsabz hua hai

jhaD sakte nahin is ke kisi taur kabhi pat

main kaT chuka hijr bahut shauq se 'jami'

mangi nahin ek pal bhi tere wasl ki KHairaat