wo shaKHs do ko hamesha hi tin kahta hai

vo shaḳhs do ko hamesha hī tiin kahtā hai

kamāl ye bhī hai ḳhud ko zahīn kahtā hai

zamānā us ke liye mah-jabīn kahtā hai

vo ḳhud ko phir bhī to pardā-nashīn kahtā hai

kaheñ jo sach to hai mumkin zabān saath na de

magar vo jhuuT bahut behtarīn kahtā hai

hai TūTnā use ik din zarūr TūTegā

gumān hai ye jise tū yaqīn kahtā hai

ye bevaqūf bahut lagtī hai avaam use

tabhī to roz hī jumle navīn kahtā hai

karo kisī se bhī maz.hab ke naam par nafrat

batā.e koī hameñ kaun diin kahtā hai

hunar bhī ḳhuub tijārat kā dekhiye sāhab

saḌe hue ko vo tāza-tarīn kahtā hai

burā.ī kartā hai merī vo piiTh pīchhe bhale

har ek sher pe to āfrīn kahtā hai

ye lafz aate haiñ dīdār husn kā karke

ġhazal 'anīs' tabhī to hasīn kahtā hai

wo shaKHs do ko hamesha hi tin kahta hai

kamal ye bhi hai KHud ko zahin kahta hai

zamana us ke liye mah-jabin kahta hai

wo KHud ko phir bhi to parda-nashin kahta hai

kahen jo sach to hai mumkin zaban sath na de

magar wo jhuT bahut behtarin kahta hai

hai TuTna use ek din zarur TuTega

guman hai ye jise tu yaqin kahta hai

ye bewaquf bahut lagti hai awam use

tabhi to roz hi jumle nawin kahta hai

karo kisi se bhi mazhab ke nam par nafrat

batae koi hamein kaun din kahta hai

hunar bhi KHub tijarat ka dekhiye sahab

saDe hue ko wo taza-tarin kahta hai

burai karta hai meri wo piTh pichhe bhale

har ek sher pe to aafrin kahta hai

ye lafz aate hain didar husn ka karke

ghazal 'anis' tabhi to hasin kahta hai