wo shaKHs jo zaKHmon ki rida de ke gaya hai

vo shaḳhs jo zaḳhmoñ kī ridā de ke gayā hai

is shahr meñ jiine kī sazā de ke gayā hai

sadiyoñ se maiñ sannāToñ kī bastī meñ khaḌā huuñ

ye kaun mujhe sañg-e-sadā de ke gayā hai

aayā thā koī le ke ujāloñ kā sahīfa

be-nūr charāġhoñ ko ziyā de ke gayā hai

raste meñ shajar hai na kahīñ yaad kā saaya

vo jaane mujhe kaisī duā de ke gayā hai

ḳhvāboñ ke darīchoñ se guhar lūTne vaalā

kuchh merī talab se bhī sivā de ke gayā hai

sochā thā bujhā degā mire soz-e-darūñ ko

dekhā to vo sho.aloñ ko havā de ke gayā hai

vo phuul sā chehra ki jo kal saath thā mere

ik dard mire dil ko nayā de ke gayā hai

kis soch meñ Duube ho pareshān ho 'ḳhālid'

vo shaḳhs to jiine kī duā de ke gayā hai

wo shaKHs jo zaKHmon ki rida de ke gaya hai

is shahr mein jine ki saza de ke gaya hai

sadiyon se main sannaTon ki basti mein khaDa hun

ye kaun mujhe sang-e-sada de ke gaya hai

aaya tha koi le ke ujalon ka sahifa

be-nur charaghon ko ziya de ke gaya hai

raste mein shajar hai na kahin yaad ka saya

wo jaane mujhe kaisi dua de ke gaya hai

KHwabon ke darichon se guhar luTne wala

kuchh meri talab se bhi siwa de ke gaya hai

socha tha bujha dega mere soz-e-darun ko

dekha to wo shoalon ko hawa de ke gaya hai

wo phul sa chehra ki jo kal sath tha mere

ek dard mere dil ko naya de ke gaya hai

kis soch mein Dube ho pareshan ho 'KHalid'

wo shaKHs to jine ki dua de ke gaya hai