وہ ستارے وہ آسمان کہاں

وہ ستارے وہ آسمان کہاں

مجھ کو چھوڑا ہے درمیان کہاں

ڈھونڈھتا پھر رہا ہوں مدت سے

مٹ گئے سب ترے نشان کہاں

کیسے تیرے بنا غزل ہوگی

زندگی تیری داستان کہاں

بس تری یاد رہ گئی دل میں

تیرے آنے کا اب گمان کہاں

عمر ساری گزار دی جس میں

اک قفس تھا مرا مکان کہاں

بعد مدت کے ہم ملے ہیں تجھے

رابطے اب وہ درمیان کہاں

یوں گناتے ہیں یہ ہنر میرے

جیسے منہ میں مرے زبان کہاں

وہی صحرا میں تشنگی ہے مگر

اب کہاں تیر وہ کمان کہاں

یاد وہ اب کہاں رہا خرمؔ

چھوڑ آیا ترا جہان کہاں