wo sitare wo aasman kahan

vo sitāre vo āsmān kahāñ

mujh ko chhoḌā hai darmiyān kahāñ

DhūñDhtā phir rahā huuñ muddat se

miT ga.e sab tire nishān kahāñ

kaise tere binā ġhazal hogī

zindagī terī dāstān kahāñ

bas tirī yaad rah ga.ī dil meñ

tere aane kā ab gumān kahāñ

'umr saarī guzār dī jis meñ

ik qafas thā mirā makān kahāñ

baa'd muddat ke ham mile haiñ tujhe

rābte ab vo darmiyān kahāñ

yuuñ gināte haiñ ye hunar mere

jaise muñh meñ mire zabān kahāñ

vahī sahrā meñ tishnagī hai magar

ab kahāñ tiir vo kamān kahāñ

yaad vo ab kahāñ rahā 'ḳhurram'

chhoḌ aayā tirā jahān kahāñ

wo sitare wo aasman kahan

mujh ko chhoDa hai darmiyan kahan

DhunDhta phir raha hun muddat se

miT gae sab tere nishan kahan

kaise tere bina ghazal hogi

zindagi teri dastan kahan

bas teri yaad rah gai dil mein

tere aane ka ab guman kahan

'umr sari guzar di jis mein

ek qafas tha mera makan kahan

ba'd muddat ke hum mile hain tujhe

rabte ab wo darmiyan kahan

yun ginate hain ye hunar mere

jaise munh mein mere zaban kahan

wahi sahra mein tishnagi hai magar

ab kahan tir wo kaman kahan

yaad wo ab kahan raha 'KHurram'

chhoD aaya tera jahan kahan