wo sitam karte gae aur main sitam sahti gai

vo sitam karte ga.e aur maiñ sitam sahtī ga.ī

kāġhazī kashtī thī maiñ barsāt meñ bahtī ga.ī

chāhe koī maane yā maane nahīñ merī dalīl

baat sach thī is liye maiñ chīḳh kar kahtī ga.ī

shāyad un ko sharm aa jaa.e to vo rusvā na hoñ

bas isī ummīd par maiñ aaj tak rahtī ga.ī

merā rishta thā samundar se to maiñ ruktī kahāñ

mauj-e-dariyā kī tarah bahtī ga.ī bahtī ga.ī

'nāz' is ummīd par shāyad ki hosh aa.e unheñ

be-asar har baat thī un par magar kahtī ga.ī

wo sitam karte gae aur main sitam sahti gai

kaghazi kashti thi main barsat mein bahti gai

chahe koi mane ya mane nahin meri dalil

baat sach thi is liye main chiKH kar kahti gai

shayad un ko sharm aa jae to wo ruswa na hon

bas isi ummid par main aaj tak rahti gai

mera rishta tha samundar se to main rukti kahan

mauj-e-dariya ki tarah bahti gai bahti gai

'naz' is ummid par shayad ki hosh aae unhen

be-asar har baat thi un par magar kahti gai