wo siyahkar wo badkar hamare kab the

vo siyahkār vo badkār hamāre kab the

ḳhaak meñ mil jo rahe the vo sitāre kab the

terī baḳhshish hai 'ināyat hai karam hai zālim

varna har samt ye tārāj nazāre kab the

ek koshish thī garebān talak jā pahuñcheñ

haath kaaTe jo ga.e ham ne pasāre kab the

ham ko mahfil se uThāne ko uThā dard-e-jigar

varna ham ḳhāk-nashīñ ḳhaak ke maare kab the

shahr kī saarī dukānoñ meñ usī ko dekhā

is tavajjoh se magar ham bhī nihāre kab the

baat niklī to kahā ham ne 'ibādī' baḌh kar

ḳhvāb rusvā jo hue ḳhvāb tumhāre kab the

wo siyahkar wo badkar hamare kab the

KHak mein mil jo rahe the wo sitare kab the

teri baKHshish hai 'inayat hai karam hai zalim

warna har samt ye taraj nazare kab the

ek koshish thi gareban talak ja pahunchen

hath kaTe jo gae hum ne pasare kab the

hum ko mahfil se uThane ko uTha dard-e-jigar

warna hum KHak-nashin KHak ke mare kab the

shahr ki sari dukanon mein usi ko dekha

is tawajjoh se magar hum bhi nihaare kab the

baat nikli to kaha hum ne 'ibaadi' baDh kar

KHwab ruswa jo hue KHwab tumhaare kab the