wo sun na pae to sada kya hai

vo sun na paa.e to sadā kyā hai

āh-o-zārī se fā.eda kyā hai

koī pūchhe to ishq vāloñ se

dard kā dil se vāsta kyā hai

haq-bayānī milī hai virse meñ

itnī hairat se dekhtā kyā hai

saare apne hue haiñ begāne

ham ko begānoñ se gila kyā hai

jhuuT kī gard saaf kar Daalo

sach na bole to aa.ina kyā hai

tum abhī yaad bhī nahīñ aa.e

phir ye siine meñ dard sā kyā hai

jaan de us ne jaan māñgī hai

ishq meñ itnā sochtā kyā hai

kitne barham dikhā.ī dete haiñ

'shād' ne aap se kahā kyā hai

wo sun na pae to sada kya hai

aah-o-zari se faeda kya hai

koi puchhe to ishq walon se

dard ka dil se wasta kya hai

haq-bayani mili hai wirse mein

itni hairat se dekhta kya hai

sare apne hue hain begane

hum ko beganon se gila kya hai

jhuT ki gard saf kar Dalo

sach na bole to aaina kya hai

tum abhi yaad bhi nahin aae

phir ye sine mein dard sa kya hai

jaan de us ne jaan mangi hai

ishq mein itna sochta kya hai

kitne barham dikhai dete hain

'shad' ne aap se kaha kya hai