wo surat gard-e-gham mein chhup gai ho

vo sūrat gard-e-ġham meñ chhup ga.ī ho

bahut mumkin ye vo hī aadmī ho

maiñ Thahrā ābshār-e-shahr-e-pur-fan

ghane jañgal kī tum bahtī nadī ho

bahut masrūf hai añgusht-e-naġhma

magar tum to abhī tak bāñsurī ho

mirī āñkhoñ meñ registāñ base haiñ

koī aise meñ sāvan kī jhaḌī ho

diyā jo bujh chukā hai phir jalānā

bahut mahsūs jab merī kamī ho

ye shab jaise koī be-māñ kī bachchī

akele rote rote so ga.ī ho

vo dariyā meñ nahānā chāñdnī kā

ki chāñdī jaise ghul kar bah rahī ho

kahānī kahne vaale kah rahe haiñ

magar jaane vahī jis par paḌī ho

miyāñ! dīvān kā mat ro.ab Daalo

paḌho koī ġhazal jo vāqa.ī ho

ġhazal vo mat sunānā ham ko shā.er

jo behad sāma.īñ meñ chal chukī ho

wo surat gard-e-gham mein chhup gai ho

bahut mumkin ye wo hi aadmi ho

main Thahra aabshaar-e-shahr-e-pur-fan

ghane jangal ki tum bahti nadi ho

bahut masruf hai angusht-e-naghma

magar tum to abhi tak bansuri ho

meri aankhon mein registan base hain

koi aise mein sawan ki jhaDi ho

diya jo bujh chuka hai phir jalana

bahut mahsus jab meri kami ho

ye shab jaise koi be-man ki bachchi

akele rote rote so gai ho

wo dariya mein nahana chandni ka

ki chandi jaise ghul kar bah rahi ho

kahani kahne wale kah rahe hain

magar jaane wahi jis par paDi ho

miyan! diwan ka mat roab Dalo

paDho koi ghazal jo waqai ho

ghazal wo mat sunana hum ko shaer

jo behad samain mein chal chuki ho