wo tere iltifat ka mausam guzar gaya

vo tere iltifāt kā mausam guzar gayā

achchhā huā ye bojh bhī sar se utar gayā

thā munhasir ḳharābi-e-dil par sukūn-e-zīst

bigḌe ham is tarah ki zamāna sañvar gayā

ab chashm-e-ārzū meñ koī dāstāñ nahīñ

afsāna-e-hayāt koī ḳhatm kar gayā

jaise nasīm chhū ke guzar jaa.e koī phuul

terā ḳhayāl yuuñ mire dil se guzar gayā

ai ḳhūn-e-ārzū tirā ehsān kyā kahūñ

tū kisht-e-ārzū mirī shādāb kar gayā

bazm-e-vafā meñ vo hama-tan-gosh the magar

hoñToñ tak aa ke harf-e-tamannā kidhar gayā

umr-e-bahār aur 'ġhanī' itnī muḳhtasar

jhapkī jo aañkh qāfla-e-dil guzar gayā

kyā pūchhte ho tum ḳhalish-e-dil kā mājrā

dāmān-e-ārzū koī kāñToñ se bhar gayā

wo tere iltifat ka mausam guzar gaya

achchha hua ye bojh bhi sar se utar gaya

tha munhasir KHarabi-e-dil par sukun-e-zist

bigDe hum is tarah ki zamana sanwar gaya

ab chashm-e-arzu mein koi dastan nahin

afsana-e-hayat koi KHatm kar gaya

jaise nasim chhu ke guzar jae koi phul

tera KHayal yun mere dil se guzar gaya

ai KHun-e-arzu tera ehsan kya kahun

tu kisht-e-arzu meri shadab kar gaya

bazm-e-wafa mein wo hama-tan-gosh the magar

honTon tak aa ke harf-e-tamanna kidhar gaya

umr-e-bahaar aur 'ghani' itni muKHtasar

jhapki jo aankh qafla-e-dil guzar gaya

kya puchhte ho tum KHalish-e-dil ka majra

daman-e-arzu koi kanTon se bhar gaya