wo tez harf jo phenka guzarne wale ne

vo tez harf jo pheñkā guzarne vaale ne

uThā liyā hai use ghar meñ Darne vaale ne

na pūchh kitnī baḌī tīrgī ko paar kiyā

zarā sī raushnī āñkhoñ meñ bharne vaale ne

na jaane din kā lahū kis qadar kashīd kiyā

shafaq se shaam ke dāman ko bharne vaale ne

bahut hī gahrā thā paanī meñ Dar gayā 'shāhīñ'

sadā to dī thī mujhe bhī utarne vaale ne

wo tez harf jo phenka guzarne wale ne

uTha liya hai use ghar mein Darne wale ne

na puchh kitni baDi tirgi ko par kiya

zara si raushni aankhon mein bharne wale ne

na jaane din ka lahu kis qadar kashid kiya

shafaq se sham ke daman ko bharne wale ne

bahut hi gahra tha pani mein Dar gaya 'shahin'

sada to di thi mujhe bhi utarne wale ne