wo tirgi-e-shab hai ki ghar lauT gae hain

vo tīrgī-e-shab hai ki ghar lauT ga.e haiñ

us dar se abhī najm-o-qamar lauT ga.e haiñ

ai mausam-e-gul tū abhī aayā hai yahāñ par

jab shāḳh-o-shajar dīda-e-tar lauT ga.e haiñ

shab bhar to tirī yaad kā mela sā lagā thā

is bhiiḌ meñ kuchh ḳhvāb-e-sahar lauT ga.e haiñ

ham haiñ ki tire saath chale jaate haiñ varna

sab log shurūāt-e-safar lauT ga.e haiñ

jab shaam ke saa.e shajar-o-shāḳh se utre

ham takte hue rāh-guzar lauT ga.e haiñ

aa.e the bahut taish meñ vo mujh ko Dubone

dekhā jo mirā azm bhañvar lauT ga.e haiñ

sannāTe tujhe malne ko aa.e the savere

rokā thā bahut ham ne magar lauT ga.e haiñ

bas ham haiñ tire shahr meñ Thahre hue ab tak

sab tājir-e-marjān-o-guhar lauT ga.e haiñ

ab ke to ye sahrā bhī sahārā nahīñ detā

dīvāne sabhī ḳhāk-ba-sar lauT ga.e haiñ

ḳhvāboñ ko 'salīm' aañkh meñ ruknā hī nahīñ thā

vo kar ke mujhe zer-o-zabar lauT ga.e haiñ

wo tirgi-e-shab hai ki ghar lauT gae hain

us dar se abhi najm-o-qamar lauT gae hain

ai mausam-e-gul tu abhi aaya hai yahan par

jab shaKH-o-shajar dida-e-tar lauT gae hain

shab bhar to teri yaad ka mela sa laga tha

is bhiD mein kuchh KHwab-e-sahar lauT gae hain

hum hain ki tere sath chale jate hain warna

sab log shuruat-e-safar lauT gae hain

jab sham ke sae shajar-o-shaKH se utre

hum takte hue rah-guzar lauT gae hain

aae the bahut taish mein wo mujh ko Dubone

dekha jo mera azm bhanwar lauT gae hain

sannaTe tujhe malne ko aae the sawere

roka tha bahut hum ne magar lauT gae hain

bas hum hain tere shahr mein Thahre hue ab tak

sab tajir-e-marjaan-o-guhar lauT gae hain

ab ke to ye sahra bhi sahaara nahin deta

diwane sabhi KHak-ba-sar lauT gae hain

KHwabon ko 'salim' aankh mein rukna hi nahin tha

wo kar ke mujhe zer-o-zabar lauT gae hain