wo to baiThe rahe sar jhukae hue

vo to baiThe rahe sar jhukā.e hue

jaadū un kī nigāhoñ ke chalte rahe

mushkiloñ ne bahut raah rokī magar

jin ko manzil kī dhun thī vo chalte rahe

maiñ unheñ bhī gale se lagātā rahā

mere baare meñ jo zahr ugalte rahe

ham to qaa.em rahe apnī har baat par

tum ba-rañg-e-zamāna badalte rahe

yaad ke jugnuoñ se vo aalam rahā

diip bujhte rahe diip jalte rahe

ham ne dāman na apnā bhigoyā 'hafīz'

dil meñ tūfān lākhoñ machalte rahe

wo to baiThe rahe sar jhukae hue

jadu un ki nigahon ke chalte rahe

mushkilon ne bahut rah roki magar

jin ko manzil ki dhun thi wo chalte rahe

main unhen bhi gale se lagata raha

mere bare mein jo zahr ugalte rahe

hum to qaem rahe apni har baat par

tum ba-rang-e-zamana badalte rahe

yaad ke jugnuon se wo aalam raha

dip bujhte rahe dip jalte rahe

hum ne daman na apna bhigoya 'hafiz'

dil mein tufan lakhon machalte rahe