wo to itna hi kare aap ka chehra dekhe

vo to itnā hī kare aap kā chehra dekhe

ishq jab hone lage dauḌ ke duniyā dekhe

aañkh khul jaa.e to vo terā hī rasta dekhe

aañkh lag jaa.e to vo ḳhvāb bhī terā dekhe

maiñ bhalā us ke bharose pe kahāñ tak jaatā

raah meñ jis ne shajar mujh se ziyāda dekhe

jo zabāñ vaalā hai chup-chāp nikal jaa.e aur

jo nazar vaalā hai vo sirf tamāsha dekhe

duniyā-dārī se bahalte nahīñ dīvāne log

shiddat-e-pyās to har samt hī dariyā dekhe

varna ik umr huī bhiiḌ meñ hañste ham ko

us kī qismat jo hameñ sāmne rotā dekhe

vo kabhī chāñd sā khil jaa.e mirī khiḌkī par

mujh ko muddat huī rātoñ meñ ujālā dekhe

wo to itna hi kare aap ka chehra dekhe

ishq jab hone lage dauD ke duniya dekhe

aankh khul jae to wo tera hi rasta dekhe

aankh lag jae to wo KHwab bhi tera dekhe

main bhala us ke bharose pe kahan tak jata

rah mein jis ne shajar mujh se ziyaada dekhe

jo zaban wala hai chup-chap nikal jae aur

jo nazar wala hai wo sirf tamasha dekhe

duniya-dari se bahalte nahin diwane log

shiddat-e-pyas to har samt hi dariya dekhe

warna ek umr hui bhiD mein hanste hum ko

us ki qismat jo hamein samne rota dekhe

wo kabhi chand sa khil jae meri khiDki par

mujh ko muddat hui raaton mein ujala dekhe