wo tujhko toD ke misl-e-habab kar dega

vo tujh ko toḌ ke misl-e-habāb kar degā

tirā ġhurūr tujhe aab aab kar degā

Thahar sakegī kahāñ shabnamī guhar kī chamak

bas ik nazar meñ fanā āftāb kar degā

kabhī to phailegī bāġh-e-hayāt meñ ḳhushbū

gulāb khil ke fazā ko gulāb kar degā

ruḳh-e-fareb pe Thahregī kyā naqāb-e-fareb

tirā fareb tujhe be-naqāb kar degā

na raas aa.egī ta.abīr-e-ḳhvāb-e-mustaqbil

ye vaqt ḳhvāb ke manzar ko ḳhvāb kar degā

dikhā ke chehra-e-māzī ke ḳhadd-o-ḳhāl tujhe

savāl-e-daur-e-ravāñ lā-javāb kar degā

jahāñ ko degī jo 'kausar' payām-e-amn-o-amāñ

adīb-e-vaqt raqam vo kitāb kar degā

wo tujh ko toD ke misl-e-habab kar dega

tera ghurur tujhe aab aab kar dega

Thahar sakegi kahan shabnami guhar ki chamak

bas ek nazar mein fana aaftab kar dega

kabhi to phailegi bagh-e-hayat mein KHushbu

gulab khil ke faza ko gulab kar dega

ruKH-e-fareb pe Thahregi kya naqab-e-fareb

tera fareb tujhe be-naqab kar dega

na ras aaegi tabir-e-KHwab-e-mustaqbil

ye waqt KHwab ke manzar ko KHwab kar dega

dikha ke chehra-e-mazi ke KHadd-o-KHal tujhe

sawal-e-daur-e-rawan la-jawab kar dega

jahan ko degi jo 'kausar' payam-e-amn-o-aman

adib-e-waqt raqam wo kitab kar dega