wo tund-KHu hi sahi mauja-e-KHizan ki tarah

vo tund-ḳhū hī sahī mauja-e-ḳhizāñ kī tarah

dikhā.ī detā to hai abr-e-mehrbāñ kī tarah

tamām-rāt sulagtā rahā zamīñ kā badan

sahar khulī to kisī jalte bādbāñ kī tarah

tirī talāsh meñ ab bhī khulā ki āñgan meñ

ravāñ hai chāñd kisī barg-e-nīm-jāñ kī tarah

maiñ jal rahā thā sulagte safed sahrā meñ

gale milā vo mujhe mauja-e-ravāñ kī tarah

chalīñ vo tund havā.eñ ki taar taar huā

vo sabz peḌ ki lagtā thā sā.ebāñ kī tarah

kahāñ pe chhoḌ gayā qāfila ḳhayāloñ kā

rukā paḌā huuñ kisī naqsh-e-be-nishāñ kī tarah

baras rahe haiñ falak se zamīn par jugnū

fazā udaas hai 'shafqat' luTe makāñ kī tarah

wo tund-KHu hi sahi mauja-e-KHizan ki tarah

dikhai deta to hai abr-e-mehrban ki tarah

tamam-raat sulagta raha zamin ka badan

sahar khuli to kisi jalte baadban ki tarah

teri talash mein ab bhi khula ki aangan mein

rawan hai chand kisi barg-e-nim-jaan ki tarah

main jal raha tha sulagte safed sahra mein

gale mila wo mujhe mauja-e-rawan ki tarah

chalin wo tund hawaen ki tar tar hua

wo sabz peD ki lagta tha saeban ki tarah

kahan pe chhoD gaya qafila KHayalon ka

ruka paDa hun kisi naqsh-e-be-nishan ki tarah

baras rahe hain falak se zamin par jugnu

faza udas hai 'shafqat' luTe makan ki tarah