wo umangen nahin ab wo dil-e-nashad nahin

vo umañgeñ nahīñ ab vo dil-e-nāshād nahīñ

vāqi.a ḳhvāb sā kuchh yaad hai kuchh yaad nahīñ

kaun se zarre pe duniyā-e-ġham ābād nahīñ

dil-e-barbād hamārā dil-e-barbād nahīñ

vo ho duniyā ki lahad yā ki ho roz-e-mahshar

mubtalā-e-ġham-e-jānāñ kahīñ āzād nahīñ

tū jo sargarm-e-tamāshā ho dam-e-mashq-e-sitam

kis ko phir shauq-e-shahādat sitam-ījād nahīñ

paas hai zabt-e-mohabbat kā sitamgar varna

ik nafas bhī mirā begāna-e-fariyād nahīñ

ab to har samt nazar aate haiñ jalve jalve

be-ḳhudī meñ koī parda dil-e-nāshād nahīñ

kāvish-e-dām-o-qafas mere liye thī goyā

varna gulshan hai vahī aaj bhī sayyād nahīñ

tābish-e-husn se ik be-ḳhudī chhā.ī pahle

baad us ke huā phir kyā ye mujhe yaad nahīñ

mar ke 'afqar' yahāñ miltī hai hayāt-e-jāved

āstāñ yaar kā hai jannat-e-shaddād nahīñ

wo umangen nahin ab wo dil-e-nashad nahin

waqia KHwab sa kuchh yaad hai kuchh yaad nahin

kaun se zarre pe duniya-e-gham aabaad nahin

dil-e-barbaad hamara dil-e-barbaad nahin

wo ho duniya ki lahad ya ki ho roz-e-mahshar

mubtala-e-gham-e-jaanan kahin aazad nahin

tu jo sargarm-e-tamasha ho dam-e-mashq-e-sitam

kis ko phir shauq-e-shahadat sitam-ijad nahin

pas hai zabt-e-mohabbat ka sitamgar warna

ek nafas bhi mera begana-e-fariyaad nahin

ab to har samt nazar aate hain jalwe jalwe

be-KHudi mein koi parda dil-e-nashad nahin

kawish-e-dam-o-qafas mere liye thi goya

warna gulshan hai wahi aaj bhi sayyaad nahin

tabish-e-husn se ek be-KHudi chhai pahle

baad us ke hua phir kya ye mujhe yaad nahin

mar ke 'afqar' yahan milti hai hayat-e-jawed

aastan yar ka hai jannat-e-shaddad nahin