wo uTh kar qayamat uThana kisi ka

vo uTh kar qayāmat uThānā kisī kā

vo dil thaam kar baiTh jaanā kisī kā

burā gar na maano to itnā kaheñ ham

ki achchhā nahīñ hai satānā kisī kā

mirī aah ne un ko taḌpā diyā hai

jinheñ khel thā dil dukhānā kisī kā

zabāñ go huī band bismil kī lekin

lab-e-zaḳhm par hai fasāna kisī kā

uThe mere pahlū se dil thaam kar vo

qayāmat huā yaad aanā kisī kā

mire dushman-e-jāñ sab ahl-e-jahāñ meñ

ki āshiq hai saarā zamāna kisī kā

ajab kyā hazāroñ ko bīmār Daale

kisī kī ayādat ko jaanā kisī kā

tire vasl se naaz hai kyoñ adū ko

rahegā na yaksāñ zamāna kisī kā

mujhe aur bhī bad-gumāñ kar rahā hai

qasam mere sar kī na khānā kisī kā

taḌapne meñ kyā jaane kyā muñh se nikle

na dukhtā huā dil dukhānā kisī kā

vo 'naushād' kā chheḌnā vasl kī shab

vo sharmā ke āñkheñ jhukānā kisī kā

wo uTh kar qayamat uThana kisi ka

wo dil tham kar baiTh jaana kisi ka

bura gar na mano to itna kahen hum

ki achchha nahin hai satana kisi ka

meri aah ne un ko taDpa diya hai

jinhen khel tha dil dukhana kisi ka

zaban go hui band bismil ki lekin

lab-e-zaKHm par hai fasana kisi ka

uThe mere pahlu se dil tham kar wo

qayamat hua yaad aana kisi ka

mere dushman-e-jaan sab ahl-e-jahan mein

ki aashiq hai sara zamana kisi ka

ajab kya hazaron ko bimar Dale

kisi ki ayaadat ko jaana kisi ka

tere wasl se naz hai kyon adu ko

rahega na yaksan zamana kisi ka

mujhe aur bhi bad-guman kar raha hai

qasam mere sar ki na khana kisi ka

taDapne mein kya jaane kya munh se nikle

na dukhta hua dil dukhana kisi ka

wo 'naushad' ka chheDna wasl ki shab

wo sharma ke aankhen jhukana kisi ka