wo uTThe hain tewar badalte hue

vo uTThe haiñ tevar badalte hue

chalo dekheñ talvār chalte hue

na dekhā tire daur meñ ai falak

nihāl-e-tamannā ko phalte hue

haiñ añgusht-hairat-ba-dandāñ masīh

vo murde jilāte haiñ chalte hue

chalo mai-kada mahfil-e-va.az se

ye ammāme dekho uchhalte hue

zabāñ par tirā naam jab aa gayā

to girte ko dekhā sambhalte hue

mohabbat meñ paa.e har ik raah se

hazāroñ hī raste nikalte hue

haiñ kyā un kī zulfeñ ye ai dil na pūchh

chhalāve ko dekhā hai chhalte hue

bane juzv-e-tan jab chubhe ḳhār-e-ġham

ye kāñTe na dekhe nikalte hue

kiyā kuchh na jab tak rahā iḳhtiyār

jahāñ se chale haath malte hue

ġham-e-ishq paidā huā mere saath

use guzrī ik 'umr palte hue

ruke kis tarah teġh-e-abrū kā vaar

sunā hai ajal ko bhī Talte hue

in āñkhoñ ke fitnoñ kā kyā pūchhnā

ye jaadū haiñ lākhoñ meñ chalte hue

nahīñ sham.a-e-āriz pe ḳhat jam' haiñ

hazāroñ hī parvāne jalte hue

fasāne haiñ mash.hūr ushshāq ke

kaTī 'umr furqat meñ jalte hue

javāñ marte dekhe bahut nā-murād

sunā hogā armāñ nikalte hue

nahīñ khel chalnā rah-e-'ishq meñ

zarā paañv rakhnā sambhalte hue

jo mash.hūr sābit qadam the 'habīb'

unheñ ham ne dekhā phisalte hue

wo uTThe hain tewar badalte hue

chalo dekhen talwar chalte hue

na dekha tere daur mein ai falak

nihaal-e-tamanna ko phalte hue

hain angusht-hairat-ba-dandan masih

wo murde jilate hain chalte hue

chalo mai-kada mahfil-e-waz se

ye ammame dekho uchhalte hue

zaban par tera nam jab aa gaya

to girte ko dekha sambhalte hue

mohabbat mein pae har ek rah se

hazaron hi raste nikalte hue

hain kya un ki zulfen ye ai dil na puchh

chhalawe ko dekha hai chhalte hue

bane juzw-e-tan jab chubhe KHar-e-gham

ye kanTe na dekhe nikalte hue

kiya kuchh na jab tak raha iKHtiyar

jahan se chale hath malte hue

gham-e-ishq paida hua mere sath

use guzri ek 'umr palte hue

ruke kis tarah tegh-e-abru ka war

suna hai ajal ko bhi Talte hue

in aankhon ke fitnon ka kya puchhna

ye jadu hain lakhon mein chalte hue

nahin shama-e-ariz pe KHat jam' hain

hazaron hi parwane jalte hue

fasane hain mashhur ushshaq ke

kaTi 'umr furqat mein jalte hue

jawan marte dekhe bahut na-murad

suna hoga arman nikalte hue

nahin khel chalna rah-e-'ishq mein

zara panw rakhna sambhalte hue

jo mashhur sabit qadam the 'habib'

unhen hum ne dekha phisalte hue