وہ وفور لالہ و گل نہیں وہ نشاط قلب و نظر نہیں

وہ وفور لالہ و گل نہیں وہ نشاط قلب و نظر نہیں

جو ارم بکف تھی دم سحر وہ بہار شاخ و شجر نہیں

یہ زمانہ فرصت غم اگر مجھے دے تو میں بھی دکھا سکوں

کہ تجلیاں مرے شوق کی فقط ایک رقص شرر نہیں

تری یاد باعث راحت تپش خیال تو ہے مگر

میں ہجوم شوق کو کیا کروں مرے بس میں دیدۂ تر نہیں

یہ رضائے یار کا پاس ہے کہ یہ سازشیں ہیں حواس کی

مرے دل میں سوز فغاں تو ہے مرے لب پہ آہ سحر نہیں

مرا شوق آبلہ پا سہی مری راہ راہ فنا سہی

جو ترا خیال ہو راہ بر تو اندھیری رات کا ڈر نہیں

تو کمال شوق سے ساز اٹھا مری جان تاروں کے گیت گا

تری بزم گاہ طرب میں اب کسی دل جلے کا گزر نہیں