wo yun shakl-e-tarz-e-bayan khinchte hain

vo yuuñ shakl-e-tarz-e-bayāñ khīñchte haiñ

ki qaa.il kī goyā zabāñ khīñchte haiñ

ye tash.hīr dekho sag-e-kū-e-dilbar

abhī tak mirī haDDiyāñ khīñchte haiñ

kare gar koī zikr jā kar hamārā

vo taalū se us kī zabāñ khīñchte haiñ

na sadme se kyuuñ ḳhushk ho ḳhūn-e-bulbul

guloñ kā araq bāġhbāñ khīñchte haiñ

baḌhī hai safar meñ vatan kī mohabbat

makīnoñ ko kyā kyā makāñ khīñchte haiñ

kare kaun saudā-e-zulf-e-musalsal

hamīñ haiñ jo ye beḌiyāñ khīñchte haiñ

pas-e-marg me.arāj āshiq kī dekho

lahad kī zamīñ āsmāñ khīñchte haiñ

nishāna banā.eñge tīr-e-nazar kā

mohabbat ke dil par nishāñ khīñchte haiñ

zarā dam to lene de ai maut mujh ko

Thahar kar nafas nā-tavāñ khīñchte haiñ

za.īfī meñ bhī dil meñ hai yād-e-abrū

kabāda haiñ ḳhud aur kamāñ khīñchte haiñ

mujhe dekh kar jab vo muñh moḌte haiñ

to dil meñ chhupā kar sināñ khīñchte haiñ

ġhazab hai hasīnoñ kā taur-e-takallum

diloñ ko ye jādū-bayāñ khīñchte haiñ

baḌhā fikr meñ rañg zardi-e-ruḳh se

ye itr-e-gul-e-za.afrāñ khīñchte haiñ

'habīb' ab zamīñ āsmāñ sar pe leñge

ki naale mire bijliyāñ khīñchte haiñ

wo yun shakl-e-tarz-e-bayan khinchte hain

ki qail ki goya zaban khinchte hain

ye tashhir dekho sag-e-ku-e-dilbar

abhi tak meri haDDiyan khinchte hain

kare gar koi zikr ja kar hamara

wo talu se us ki zaban khinchte hain

na sadme se kyun KHushk ho KHun-e-bulbul

gulon ka araq baghban khinchte hain

baDhi hai safar mein watan ki mohabbat

makinon ko kya kya makan khinchte hain

kare kaun sauda-e-zulf-e-musalsal

hamin hain jo ye beDiyan khinchte hain

pas-e-marg mearaj aashiq ki dekho

lahad ki zamin aasman khinchte hain

nishana banaenge tir-e-nazar ka

mohabbat ke dil par nishan khinchte hain

zara dam to lene de ai maut mujh ko

Thahar kar nafas na-tawan khinchte hain

zaifi mein bhi dil mein hai yaad-e-abru

kabaada hain KHud aur kaman khinchte hain

mujhe dekh kar jab wo munh moDte hain

to dil mein chhupa kar sinan khinchte hain

ghazab hai hasinon ka taur-e-takallum

dilon ko ye jadu-bayan khinchte hain

baDha fikr mein rang zardi-e-ruKH se

ye itr-e-gul-e-zafran khinchte hain

'habib' ab zamin aasman sar pe lenge

ki nale mere bijliyan khinchte hain