wo zakat-e-daulat-e-sabr bhi mere chand ashkon ke nam se

vo zakāt-e-daulat-e-sabr bhī mire chand ashkoñ ke naam se

vo nazar-guzar kī sharāb thī jo chhalak ga.ī mire jaam se

mirī chashm-e-shauq meñ kaif-e-dil jo bharā thā ḳhuun ke naam se

vahī sho.ala ban ke bhaḌak uThā vahī phuuT niklā hai jaam se

koī raat āñkhoñ meñ kaaT lī koī taare gin ke guzār dī

yahī marte marte havas rahī maiñ kabhī to so rahūñ shaam se

baḌī dil-fareb hai dāstāñ tirā zikr aur mirā bayāñ

vo dahan dahan vo zabāñ zabāñ jo hai āshnā tire naam se

mujhe kyā zarūrat-e-chāra-gar isī ik davā meñ haiñ do asar

kabhī mar-miTā tire naam par kabhī jī uThā tire naam se

mujhe vaa.iz apnī lagī hai dhun koī phuul ātish-e-tar kā chun

mire dard-e-dil kī hadīs sun kabhī chheḌ kar lab-e-jām se

jo azal meñ thā vahī nuur hai ki charāġh-e-mahfil-e-tūr hai

koī rahne vaalā zarūr hai mire dil meñ dard ke naam se

jo taḌap thī kal vahī aaj hai yahī mire dil kā ilaaj hai

mirī zindagī bhī 'sirāj' hai isī iztirāb-e-davām se

wo zakat-e-daulat-e-sabr bhi mere chand ashkon ke nam se

wo nazar-guzar ki sharab thi jo chhalak gai mere jam se

meri chashm-e-shauq mein kaif-e-dil jo bhara tha KHun ke nam se

wahi shoala ban ke bhaDak uTha wahi phuT nikla hai jam se

koi raat aankhon mein kaT li koi tare gin ke guzar di

yahi marte marte hawas rahi main kabhi to so rahun sham se

baDi dil-fareb hai dastan tera zikr aur mera bayan

wo dahan dahan wo zaban zaban jo hai aashna tere nam se

mujhe kya zarurat-e-chaara-gar isi ek dawa mein hain do asar

kabhi mar-miTa tere nam par kabhi ji uTha tere nam se

mujhe waiz apni lagi hai dhun koi phul aatish-e-tar ka chun

mere dard-e-dil ki hadis sun kabhi chheD kar lab-e-jam se

jo azal mein tha wahi nur hai ki charagh-e-mahfil-e-tur hai

koi rahne wala zarur hai mere dil mein dard ke nam se

jo taDap thi kal wahi aaj hai yahi mere dil ka ilaj hai

meri zindagi bhi 'siraj' hai isi iztirab-e-dawam se