وہ زخم پر زخم دے رہے ہیں میں زخم پر زخم کھا رہا ہوں

وہ زخم پر زخم دے رہے ہیں میں زخم پر زخم کھا رہا ہوں

کوئی مجھے آزما رہا ہے کسی کو میں آزما رہا ہوں

خیال کا میکدہ کھلا ہے سبو امیدوں کا پا رہا ہوں

ترے تصور کا ہے کرشمہ کہ بے پیے لڑ کھڑا رہا ہوں

ہوا مخالف زمانہ دشمن جو راہبر تھے وہی ہیں رہزن

مگر عزائم کی روشنی میں قدم بڑھاتا ہی جا رہا ہوں

نہ جانے اس دل کے بت کدے میں صنم ہیں کتنے طرح طرح کے

مگر یہ حیرت ہے کہ ہر اک سے وفا کی میں داد پا رہا ہوں

مرے ہی دم سے ہے کج کلاہی یہ خود نمائی یہ خود ستائی

مذاق اڑائیں نہ آپ میرا غرور میں آپ کا رہا ہوں

تھکی ہوئی ہے امید میری تھکا ہوا حوصلہ ہے میرا

کرو نہ منزل کا ذکر مجھ سے میں خود کو ناکام پا رہا ہوں

گراں تھا جن کا خیال بھی کل مری طبیعت کی سادگی پر

میں آج ناشادؔ ان کی چوکھٹ پہ اپنے سر کو جھکا رہا ہوں