wo zaKHm par zaKHm de rahe hain main zaKHm par zaKHm kha raha hun

vo zaḳhm par zaḳhm de rahe haiñ maiñ zaḳhm par zaḳhm khā rahā huuñ

koī mujhe aazmā rahā hai kisī ko maiñ aazmā rahā huuñ

ḳhayāl kā mai-kada khulā hai subū umīdoñ kā pā rahā huuñ

tire tasavvur kā hai karishma ki be-piye laḌ-khḌā rahā huuñ

huā muḳhālif zamāna dushman jo rāhbar the vahī haiñ rahzan

magar azā.em kī raushnī meñ qadam baḌhātā hī jā rahā huuñ

na jaane is dil ke but-kade meñ sanam haiñ kitne tarah tarah ke

magar ye hairat hai ki har ik se vafā kī maiñ daad pā rahā huuñ

mire hī dam se hai kaj-kulāhī ye ḳhud-numā.ī ye ḳhud-satā.ī

mazāq uḌā.eñ na aap merā ġhurūr maiñ aap kā rahā huuñ

thakī huī hai umiid merī thakā huā hausla hai merā

karo na manzil kā zikr mujh se maiñ ḳhud ko nākām pā rahā huuñ

girāñ thā jin kā ḳhayāl bhī kal mirī tabī.at kī sādgī par

maiñ aaj 'nāshād' un kī chaukhaT pe apne sar ko jhukā rahā huuñ

wo zaKHm par zaKHm de rahe hain main zaKHm par zaKHm kha raha hun

koi mujhe aazma raha hai kisi ko main aazma raha hun

KHayal ka mai-kada khula hai subu umidon ka pa raha hun

tere tasawwur ka hai karishma ki be-piye laD-khDa raha hun

hua muKHalif zamana dushman jo rahbar the wahi hain rahzan

magar azaem ki raushni mein qadam baDhata hi ja raha hun

na jaane is dil ke but-kade mein sanam hain kitne tarah tarah ke

magar ye hairat hai ki har ek se wafa ki main dad pa raha hun

mere hi dam se hai kaj-kulahi ye KHud-numai ye KHud-satai

mazaq uDaen na aap mera ghurur main aap ka raha hun

thaki hui hai umid meri thaka hua hausla hai mera

karo na manzil ka zikr mujh se main KHud ko nakaam pa raha hun

giran tha jin ka KHayal bhi kal meri tabiat ki sadgi par

main aaj 'nashad' un ki chaukhaT pe apne sar ko jhuka raha hun