wo zamin par na aasman mein tha

vo zamīñ par na āsmān meñ thā

aag paanī ke darmiyān meñ thā

jism-o-jāñ meñ ajab raqābat thī

ishq be-chāra imtihān meñ thā

sar-ba-kaf maiñ bhī thā sar-e-maqtal

tiir vo bhī liye kamān meñ thā

sāmne barf kī nadī thī magar

band āñkheñ kiye vo dhyān meñ thā

par sameTe hue jo baiThā hai

vo parinda kabhī uḌaan meñ thā

āgahī ruuh tak jalā degī

dostoñ ye kahāñ gumān meñ thā

vaqt ne ham se vo bhī chhīn liyā

ik sahārā jo ḳhāndān meñ thā

dar-pa-e-qatl hai jo aaj 'niyāz'

ye ilāqa mirī kamān meñ thā

wo zamin par na aasman mein tha

aag pani ke darmiyan mein tha

jism-o-jaan mein ajab raqabat thi

ishq be-chaara imtihan mein tha

sar-ba-kaf main bhi tha sar-e-maqtal

tir wo bhi liye kaman mein tha

samne barf ki nadi thi magar

band aankhen kiye wo dhyan mein tha

par sameTe hue jo baiTha hai

wo parinda kabhi uDan mein tha

aagahi ruh tak jala degi

doston ye kahan guman mein tha

waqt ne hum se wo bhi chhin liya

ek sahaara jo KHandan mein tha

dar-pa-e-qatl hai jo aaj 'niyaz'

ye ilaqa meri kaman mein tha