wo zist jo lazzat-kash-e-alam rahi hai

vo ziist jo lazzat-kash-e-ālām rahī hai

vo ziist tire naam se mansūb huī hai

kyoñ hijr kī shab mahkī tire qurb kī ḳhushbū

kyā koī kalī yaad ke gulshan meñ khilī hai

ai guzre hue lamho koī naqsh ubhāro

ā.īna-e-taḳhyīl pe ab gard jamī hai

ik ham haiñ ki ḳhāk-e-rah-e-jānāñ meñ abhī tak

ik vo haiñ ki un kī vahī begāna-ravī hai

ai gardish-e-ayyām koī zaḳhm nayā aur

ik moḌ pe ab ‘umr-e-ravāñ Thahr ga.ī hai

rūdād-e-ġham-e-dil maiñ sunā.ūñ tujhe kyūñkar

maiñ dekh rahā huuñ tirī āñkhoñ meñ namī hai

ab guzre hue vaqt kā kuchh zikr na chheḌo

mushkil se tabī'at mirī qaabū meñ huī hai

muddat se kisī dard kā tohfa nahīñ aaya

yā gardish-e-ayyām hameñ bhuul ga.ī hai

ai bād-e-sahar aaj to chup-chāp guzar jā

hone de zarā der abhī aañkh lagī hai

mai laao ġhazal gaao qarīb aao shab-e-māh

sharminda nigāhoñ se hameñ dekh rahī hai

mat pūchh ki kyā ham pe guzartī hai tire baa'd

baiThe haiñ jahāñ sub.h vahīñ shaam huī hai

hai avval-e-shab bazm meñ rang āḳhir-e-shab kā

kyā sham' koī vaqt se pahle hī bujhī hai

wo zist jo lazzat-kash-e-alam rahi hai

wo zist tere nam se mansub hui hai

kyon hijr ki shab mahki tere qurb ki KHushbu

kya koi kali yaad ke gulshan mein khili hai

ai guzre hue lamho koi naqsh ubhaaro

aaina-e-taKHyil pe ab gard jami hai

ek hum hain ki KHak-e-rah-e-jaanan mein abhi tak

ek wo hain ki un ki wahi begana-rawi hai

ai gardish-e-ayyam koi zaKHm naya aur

ek moD pe ab ‘umr-e-rawan Thahr gai hai

rudad-e-gham-e-dil main sunaun tujhe kyunkar

main dekh raha hun teri aankhon mein nami hai

ab guzre hue waqt ka kuchh zikr na chheDo

mushkil se tabi'at meri qabu mein hui hai

muddat se kisi dard ka tohfa nahin aaya

ya gardish-e-ayyam hamein bhul gai hai

ai baad-e-sahar aaj to chup-chap guzar ja

hone de zara der abhi aankh lagi hai

mai lao ghazal gao qarib aao shab-e-mah

sharminda nigahon se hamein dekh rahi hai

mat puchh ki kya hum pe guzarti hai tere ba'd

baiThe hain jahan subh wahin sham hui hai

hai awwal-e-shab bazm mein rang aaKHir-e-shab ka

kya sham' koi waqt se pahle hi bujhi hai