wo zulf hawa se mujhe barham nazar aai

vo zulf havā se mujhe barham nazar aa.ī

uḌtī huī nāgan qadd-e-āmdam nazar aa.ī

hai panja-e-rañgīñ meñ hamārā dil-e-betāb

ye aag to sīmāb se bāham nazar aa.ī

āġhāz meñ hastī kī ajal aa ga.ī ai dil

jo chiiz muaḳhḳhar thī muqaddam nazar aa.ī

shabnam kī hai añgiyā tale añgiyā ke pasīne

kyā lutf hai shabnam tah-e-shabnam nazar aa.ī

majrūh kiyā ulfat-e-abrū ne dam-e-haj

mehrāb-e-haram nāḳhun-e-zaiġham nazar aa.ī

adnā hai ye ai jaan sarāpe kī latāfat

parchhā.īñ tirī hūr-e-mujassam nazar aa.ī

zanjīr pahanñe se huā qaidiyoñ kā naam

har ek kaḌī halqa-e-ḳhātam nazar aa.ī

tauba kī magar nashshe se us hūr-shiyam ne

kyuuñ ātish-e-mai nār-e-jahannam nazar aa.ī

tum bāloñ ko khole hue gulshan meñ jo aa.e

har shāḳh-e-shajar zulf-e-namat-ḳham nazar aa.ī

bad-zan na ho kis tarah 'munīr' aaj ḳhudārā

maskī huī ai but tirī mahram nazar aa.ī

wo zulf hawa se mujhe barham nazar aai

uDti hui nagan qadd-e-amdam nazar aai

hai panja-e-rangin mein hamara dil-e-betab

ye aag to simab se baham nazar aai

aaghaz mein hasti ki ajal aa gai ai dil

jo chiz muaKHKHar thi muqaddam nazar aai

shabnam ki hai angiya tale angiya ke pasine

kya lutf hai shabnam tah-e-shabnam nazar aai

majruh kiya ulfat-e-abru ne dam-e-haj

mehrab-e-haram naKHun-e-zaigham nazar aai

adna hai ye ai jaan sarape ki latafat

parchhain teri hur-e-mujassam nazar aai

zanjir pahanne se hua qaidiyon ka nam

har ek kaDi halqa-e-KHatam nazar aai

tauba ki magar nashshe se us hur-shiyam ne

kyun aatish-e-mai nar-e-jahannam nazar aai

tum baalon ko khole hue gulshan mein jo aae

har shaKH-e-shajar zulf-e-namat-KHam nazar aai

bad-zan na ho kis tarah 'munir' aaj KHudara

maski hui ai but teri mahram nazar aai