wo zulm-o-sitam Dhae aur mujhse wafa mange

vo zulm-o-sitam Dhaa.e aur mujh se vafā māñge

jaise koī gul kar ke dīpak se ziyā māñge

jiinā baḌī ne.amat hai jiine kā chalan sīkheñ

achchhā to nahīñ koī marne kī duā māñge

ġham bhī hai udāsī bhī tanhā.ī bhī aañsū bhī

sab kuchh to mayassar hai dil māñge to kyā māñge

ā.īn-e-vatan par to dil vaar chuke apnā

nāmūs-e-vatan ham se ab rañg-e-hinā māñge

auqāt hai kyā us kī vo pesh-e-nazar rakkhe

insāñ na koī apne dāman se sivā māñge

ramtā huā jogī huuñ bahtā huā paanī huuñ

hargiz na koī mujh se ab merā patā māñge

phir chehra-e-qātil kī nazroñ ko zarūrat hai

phir kūcha-e-qātil kī dil āb-o-havā māñge

vo sair-e-gulistāñ ko 'firdaus' jo aa jaa.e

muskān kalī chāhe raftār-e-sabā māñge

wo zulm-o-sitam Dhae aur mujh se wafa mange

jaise koi gul kar ke dipak se ziya mange

jina baDi neamat hai jine ka chalan sikhen

achchha to nahin koi marne ki dua mange

gham bhi hai udasi bhi tanhai bhi aansu bhi

sab kuchh to mayassar hai dil mange to kya mange

aain-e-watan par to dil war chuke apna

namus-e-watan hum se ab rang-e-hina mange

auqat hai kya us ki wo pesh-e-nazar rakkhe

insan na koi apne daman se siwa mange

ramta hua jogi hun bahta hua pani hun

hargiz na koi mujh se ab mera pata mange

phir chehra-e-qatil ki nazron ko zarurat hai

phir kucha-e-qatil ki dil aab-o-hawa mange

wo sair-e-gulistan ko 'firdaus' jo aa jae

muskan kali chahe raftar-e-saba mange