wo zulmat-e-shab ka ghalba hai wo yas ke baadal chhae hain

vo zulmat-e-shab kā ġhalba hai vo yaas ke bādal chhā.e haiñ

ab sub.h bhī sub.h-e-ummīd nahīñ use gardish-e-daurāñ kyā hogā

dīvār-e-chaman pur-zāġh-o-zaġhan masrūf haiñ naġhma-ḳhvānī meñ

har shāḳh par ullū baiThā hai anjām-e-gulistāñ kyā hogā

aġhrāz baḌhīñ aḳhlāq miTe guftār rahī kirdār ga.e

is par bhī kahīñ Thahrāv nahīñ ai qismat-e-insāñ kyā hogā

pāband-e-salāsil nekī hai hāsil hai badī ko āzādī

ye shakl gar ta.amīr kī hai taḳhrīb kā unvāñ kyā hogā

kyuuñ ziist kā bahr-e-be-pāyāñ mahrūm hai ab ik mauj se bhī

sadiyoñ se sukūt ik taarī hai ai satvat-e-tūfāñ kyā hogā

arbāb-e-havas kā jamghaT hai is bazm meñ koī riñd nahīñ

ai jām-e-zar-afshāñ kyā hogā ai sāqī-e-daurāñ kyā hogā

is des meñ jo bhī rahzan the vo rahbar-e-millat kahlā.e

har chor nigahbāñ Thahrā hai ai qudrat-e-yazdāñ kyā hogā

wo zulmat-e-shab ka ghalba hai wo yas ke baadal chhae hain

ab subh bhi subh-e-ummid nahin use gardish-e-dauran kya hoga

diwar-e-chaman pur-zagh-o-zaghan masruf hain naghma-KHwani mein

har shaKH par ullu baiTha hai anjam-e-gulistan kya hoga

aghraaz baDhin aKHlaq miTe guftar rahi kirdar gae

is par bhi kahin Thahraw nahin ai qismat-e-insan kya hoga

paband-e-salasil neki hai hasil hai badi ko aazadi

ye shakl gar tamir ki hai taKHrib ka unwan kya hoga

kyun zist ka bahr-e-be-payan mahrum hai ab ek mauj se bhi

sadiyon se sukut ek tari hai ai satwat-e-tufan kya hoga

arbab-e-hawas ka jamghaT hai is bazm mein koi rind nahin

ai jam-e-zar-afshan kya hoga ai saqi-e-dauran kya hoga

is des mein jo bhi rahzan the wo rahbar-e-millat kahlae

har chor nigahban Thahra hai ai qudrat-e-yazdan kya hoga