wufur-e-dard ko ehsas hai main jaane wala hun

vufūr-e-dard ko ehsās hai maiñ jaane vaalā huuñ

bahut kam vaqt mere paas hai maiñ jaane vaalā huuñ

kahā jo thā ki tere baad duniyā meñ nahīñ rahnā

mujhe apne kahe kā paas hai maiñ jaane vaalā huuñ

mabādā mere jaane tak vo chashma ḳhushk ho jaa.e

mujhe āb-e-abad kī pyaas hai maiñ jaane vaalā huuñ

agar maiñ saañs lene ko rukūñ to rizq ruktā hai

mujhe hijrat musalsal raas hai maiñ jaane vaalā huuñ

vo merī ḳhalvat-e-paiham to merī bādshāhat hai

ta.alluq aarzī ban-bās hai maiñ jaane vaalā huuñ

girā.ī jā rahī haiñ yuuñ bhī dīvāreñ duāoñ kī

mire ahbāb ko vishvās hai maiñ jaane vaalā huuñ

zabānī yaad kar lo phir ye ḳhāl-o-ḳhat nahīñ hoñge

qarīb-e-sho.alagī qirtās hai maiñ jaane vaalā huuñ

ye sāmāñ bhī sa.mbhālo tum ye ehsāñ bhī uThā lo tum

yahī jo mohlat-e-anfās hai maiñ jaane vaalā huuñ

dar-o-dīvār kī hālat se andāza lagā liije

kahīñ jaale kahīñ par ghaas hai maiñ jaane vaalā huuñ

bas ab maiñ aur karb-e-kashmakash meñ rah nahīñ saktā

yahāñ har aas meñ ik yaas hai maiñ jaane vaalā huuñ

akelā hai koī merī tarah aflāk par shāhid

use merī azal se aas hai maiñ jaane vaalā huuñ

wufur-e-dard ko ehsas hai main jaane wala hun

bahut kam waqt mere pas hai main jaane wala hun

kaha jo tha ki tere baad duniya mein nahin rahna

mujhe apne kahe ka pas hai main jaane wala hun

mabaada mere jaane tak wo chashma KHushk ho jae

mujhe aab-e-abad ki pyas hai main jaane wala hun

agar main sans lene ko rukun to rizq rukta hai

mujhe hijrat musalsal ras hai main jaane wala hun

wo meri KHalwat-e-paiham to meri baadshahat hai

talluq aarzi ban-bas hai main jaane wala hun

girai ja rahi hain yun bhi diwaren duaon ki

mere ahbab ko wishwas hai main jaane wala hun

zabani yaad kar lo phir ye KHal-o-KHat nahin honge

qarib-e-shoalagi qirtas hai main jaane wala hun

ye saman bhi sambhaalo tum ye ehsan bhi uTha lo tum

yahi jo mohlat-e-anfas hai main jaane wala hun

dar-o-diwar ki haalat se andaza laga lije

kahin jale kahin par ghas hai main jaane wala hun

bas ab main aur karb-e-kashmakash mein rah nahin sakta

yahan har aas mein ek yas hai main jaane wala hun

akela hai koi meri tarah aflak par shahid

use meri azal se aas hai main jaane wala hun