wufur-e-shauq mein jab bhi kalam karte hain

vufūr-e-shauq meñ jab bhī kalām karte haiñ

to harf harf ko husn-e-tamām karte haiñ

ghane daraḳhtoñ ke saa.e kī 'umr lambī ho

ki in ke nīche musāfir qayām karte haiñ

use pasand nahīñ ḳhvāb kā havāla bhī

to ham bhī aañkh pe nīñdeñ harām karte haiñ

na ḳhushbuoñ ko pata hai na rang jānte haiñ

parind phūloñ se kaise kalām karte haiñ

ravāñ-davāñ haiñ havā par savāriyāñ kaisī

jinheñ daraḳht bhī jhuk kar salām karte haiñ

chaman meñ jab se use sair karte dekh liyā

usī adā se ġhazālāñ ḳhirām karte haiñ

ab is ko yaad na hogā hamārā chehra bhī

tamām shā.erī ham jis ke naam karte haiñ

wufur-e-shauq mein jab bhi kalam karte hain

to harf harf ko husn-e-tamam karte hain

ghane daraKHton ke sae ki 'umr lambi ho

ki in ke niche musafir qayam karte hain

use pasand nahin KHwab ka hawala bhi

to hum bhi aankh pe ninden haram karte hain

na KHushbuon ko pata hai na rang jaante hain

parind phulon se kaise kalam karte hain

rawan-dawan hain hawa par sawariyan kaisi

jinhen daraKHt bhi jhuk kar salam karte hain

chaman mein jab se use sair karte dekh liya

usi ada se ghazalan KHiram karte hain

ab is ko yaad na hoga hamara chehra bhi

tamam shaeri hum jis ke nam karte hain