wufur-e-zof se dil yar par nahin aata

vufūr-e-zof se dil yaar par nahīñ aatā

ġham-e-firāq meñ jiinā nazar nahīñ aatā

nigāh-e-dīda-e-dil se nazar nahīñ aatā

ḳhayāl-e-yār bhī do do pahar nahīñ aatā

visāl-e-dost bhī bād-e-visāl hai shāyad

ki jo udhar ko gayā phir idhar nahīñ aatā

ġhubār-e-chashm bhī hai justujū meñ sargardāñ

havā meñ ḳhaak bhī vo rāhbar nahīñ aatā

chaḌhā.e gor-e-ġharībāñ pe kaun chādar-e-gul

charāġh le ke koī qabr par nahīñ aatā

ye roz shaam se hai sub.h tak ḳhud-ārā.ī

ki shab ko ā.īna bhī apne ghar nahīñ aatā

na sham.a-rū pe bhī duuñ jaan misl-e-parvāna

ki nām-e-ishq ko badnām kar nahīñ aatā

maiñ shab ko lā ke use 'arsh' ḳhaak huuñ ham-ḳhvāb

vo shoḳh ḳhāna-ḳharāb apne ghar nahīñ aatā

wufur-e-zof se dil yar par nahin aata

gham-e-firaq mein jina nazar nahin aata

nigah-e-dida-e-dil se nazar nahin aata

KHayal-e-yar bhi do do pahar nahin aata

visal-e-dost bhi baad-e-visal hai shayad

ki jo udhar ko gaya phir idhar nahin aata

ghubar-e-chashm bhi hai justuju mein sargardan

hawa mein KHak bhi wo rahbar nahin aata

chaDhae gor-e-ghariban pe kaun chadar-e-gul

charagh le ke koi qabr par nahin aata

ye roz sham se hai subh tak KHud-arai

ki shab ko aaina bhi apne ghar nahin aata

na shama-ru pe bhi dun jaan misl-e-parwana

ki nam-e-ishq ko badnam kar nahin aata

main shab ko la ke use 'arsh' KHak hun ham-KHwab

wo shoKH KHana-KHarab apne ghar nahin aata