وسعت مرے خیال میں ارض و سما کی ہے

وسعت مرے خیال میں ارض و سما کی ہے

محرم نظر مری حرم کبریا کی ہے

ہر شے سے حسن صانع قدرت ہے آشکار

ہر گل میں بو بسی کسی رنگیں ادا کی ہے

پہنچیں دعائیں باب حریم قبول تک

تاثیر یہ کسی دل درد آشنا کی ہے

گلشن میں ہے خرام عروس بہار کا

کترے ہیں گل یہ طرفہ روش نقش پا کی ہے

اب دیدنی ہے ہر گل رنگیں کا بانکپن

عالم شباب کا ہے نزاکت بلا کی ہے

گلزار مرغزار میں اور سبزہ زار میں

ندی رواں نسیم کے جود و سخا کی ہے

بلبل کی لے میں بربط توحید کا ہے سوز

ہر سمت دھوم باغ میں صل علی کی ہے

نغمہ سرا ہے فاختہ وحدت کے ساز پر

نالوں میں قمریوں کے عجب نے صفا کی ہے

کلیوں کے قہقہے ہیں فضائے بسیط میں

غنچوں سے آج آنکھ مچولی صبا کی ہے

مخفیؔ کسی غریب کے نالوں کا ہے اثر

آیا ہے ابر جھوم کے رحمت خدا کی ہے