ya-ali kah kar but-e-pindar toDa chahiye

yā-alī kah kar but-e-pindār toḌā chāhiye

nafs-e-ammāra kī gardan ko maroḌā chāhiye

tañg aa kar jism ko ai ruuh chhoḌā chāhiye

tifl-tabaoñ ke liye miTTī kā ghoḌā chāhiye

zulf ke saude meñ apne sar ko phoḌā chāhiye

jab balā kā sāmnā ho muñh na moḌā chāhiye

ghūrtī hai tum ko nargis aañkh phoḌā chāhiye

gul bahut hañste haiñ kaan un ke maroḌā chāhiye

āj-kal hotā hai apnā ishq-e-pinhāñ āshkār

pak chukā hai ḳhuub ab phūTe ye phoḌā chāhiye

māñgtā huuñ maiñ ḳhudā se apne dil se dāġh-e-ishq

bādshāh-e-husn ke sikke kā toḌā chāhiye

un laboñ ke ishq ne hai jaise dīvāna kiyā

baḌ apnī hai ik lāloñ kā joḌā chāhiye

de rahā hai gesu-e-mushkīn saude ko jagah

kis ke aage jā ke apne sar ko phoḌā chāhiye

bāda-e-gul-gūñ ke shīshe kā huuñ saa.il sāqiyā

saath kaifiyyat ke uḌtā mujh ko ghoḌā chāhiye

ye sadā aatī hai raftār-e-samand-e-umr se

vo bhī ghoḌā hai koī jis ko ki koḌā chāhiye

qat.a miqrāz-e-ḳhamoshī se zabāñ ko kījiye

qufl de kar ganj par miftāh toḌā chāhiye

apne dīvāne kā dil le kar ye kahtā hai vo tifl

ye khilaunā hai isī qābil ki toḌā chāhiye

zulfeñ rū-e-yār par be-vaj.h lahrātī nahīñ

kuchh na kuchh zahr agle ye kaale kā joḌā chāhiye

bāġhbāñ se chhup ke gul-chīnī jo kī to kyā kiyā

aañkh bulbul kī bachā kar phuul toḌā chāhiye

fasl-e-gul meñ beḌiyāñ kaaTī haiñ mere paañv kī

haath meñ haddād ke sone kā toḌā chāhiye

bāġh-e-ālam meñ yahī merī duā hai roz-o-shab

ḳhaar ḳhaar ishq-e-gul-e-ruḳhsār toḌā chāhiye

ishq kī mushkil-pasandī se huā ye āshkār

ḳhūbsūrat ko ġhurūr-e-husn thoḌā chāhiye

zamzame sun kar mire sayyād-e-gul-rū ne kahā

zab.h kiije aise bulbul ko na chhoḌā chāhiye

piir ho 'ātish' kafan kā sāmnā hai an-qarīb

tauba kiije dāman-e-tar ko nichoḌā chāhiye

ya-ali kah kar but-e-pindar toDa chahiye

nafs-e-ammara ki gardan ko maroDa chahiye

tang aa kar jism ko ai ruh chhoDa chahiye

tifl-tabaon ke liye miTTi ka ghoDa chahiye

zulf ke saude mein apne sar ko phoDa chahiye

jab bala ka samna ho munh na moDa chahiye

ghurti hai tum ko nargis aankh phoDa chahiye

gul bahut hanste hain kan un ke maroDa chahiye

aaj-kal hota hai apna ishq-e-pinhan aashkar

pak chuka hai KHub ab phuTe ye phoDa chahiye

mangta hun main KHuda se apne dil se dagh-e-ishq

baadshah-e-husn ke sikke ka toDa chahiye

un labon ke ishq ne hai jaise diwana kiya

baD apni hai ek lalon ka joDa chahiye

de raha hai gesu-e-mushkin saude ko jagah

kis ke aage ja ke apne sar ko phoDa chahiye

baada-e-gul-gun ke shishe ka hun sail saqiya

sath kaifiyyat ke uDta mujh ko ghoDa chahiye

ye sada aati hai raftar-e-samand-e-umr se

wo bhi ghoDa hai koi jis ko ki koDa chahiye

qata miqraaz-e-KHamoshi se zaban ko kijiye

qufl de kar ganj par miftah toDa chahiye

apne diwane ka dil le kar ye kahta hai wo tifl

ye khilauna hai isi qabil ki toDa chahiye

zulfen ru-e-yar par be-wajh lahraati nahin

kuchh na kuchh zahr agle ye kale ka joDa chahiye

baghban se chhup ke gul-chini jo ki to kya kiya

aankh bulbul ki bacha kar phul toDa chahiye

fasl-e-gul mein beDiyan kaTi hain mere panw ki

hath mein haddad ke sone ka toDa chahiye

bagh-e-alam mein yahi meri dua hai roz-o-shab

KHar KHar ishq-e-gul-e-ruKHsar toDa chahiye

ishq ki mushkil-pasandi se hua ye aashkar

KHubsurat ko ghurur-e-husn thoDa chahiye

zamzame sun kar mere sayyaad-e-gul-ru ne kaha

zabh kije aise bulbul ko na chhoDa chahiye

pir ho 'atish' kafan ka samna hai an-qarib

tauba kije daman-e-tar ko nichoDa chahiye