ya-ilahi mujhe wo tarz-e-lisani mil jae

yā-ilāhī mujhe vo tarz-e-lisānī mil jaa.e

qabl-e-guftār mire lafz ko ma.anī mil jaa.e

tū ne kitnoñ ke safīnoñ ko kināre baḳhshe

merī kashtī ko bhī ai bahr ravānī mil jaa.e

beshtar ham tirī yādoñ ko bhulā baiThe the

kyā kare koī jo tasvīr purānī mil jaa.e

ham musannif ke tasavvur meñ ghuTe jaate haiñ

apne kirdār ko ab koī kahānī mil jaa.e

dil to sahrā ke sarāboñ se bahal jaatā hai

tū nahīñ hai to tirī koī nishānī mil jaa.e

kar chukā ho tū gulistānoñ ko sairāb agar

ai falak bāñjh zamīnoñ ko bhī paanī mil jaa.e

soch ta.abīr ko Dar jaatā hai qalb-e-yūsuf

chashm-e-pīrī ko agar ḳhvāb-e-javānī mil jaa.e

ya-ilahi mujhe wo tarz-e-lisani mil jae

qabl-e-guftar mere lafz ko mani mil jae

tu ne kitnon ke safinon ko kinare baKHshe

meri kashti ko bhi ai bahr rawani mil jae

beshtar hum teri yaadon ko bhula baiThe the

kya kare koi jo taswir purani mil jae

hum musannif ke tasawwur mein ghuTe jate hain

apne kirdar ko ab koi kahani mil jae

dil to sahra ke sarabon se bahal jata hai

tu nahin hai to teri koi nishani mil jae

kar chuka ho tu gulistanon ko sairab agar

ai falak banjh zaminon ko bhi pani mil jae

soch tabir ko Dar jata hai qalb-e-yusuf

chashm-e-piri ko agar KHwab-e-jawani mil jae