یا رب ہے دل مدام کسی اضطرار میں

یا رب ہے دل مدام کسی اضطرار میں

کچھ نقش رہ گیا ہے ترے شاہکار میں

اب پڑ چکی ہے خوب تمنا کی خو مجھے

تم آ گئے ہو میں ہوں مگر انتظار میں

تنہائی سفر کی اذیت ہے دل شکن

اب کوئی راہزن ہی ملے رہ گزار میں

تیرے ستم پہ تیری طرف دیکھ کر ہوں چپ

کتنی طویل بات ہے اس اختصار میں

اب یہ کھلا کہ وہ بھی مری جستجو میں تھے

میں جن کو ڈھونڈھتا تھا سواد بہار میں

گل رنگ مے بکھیر کے رخ پر چلے ہیں وہ

قوس قزح طلوع ہوئی رہ گزار میں

شوکتؔ بچھڑ گیا ہوں اسی قافلے سے میں

منزل غروب ہو گئی جس کے غبار میں