ya-rab hai dil mudam kisi iztirar mein

yā-rab hai dil mudām kisī iztirār meñ

kuchh naqsh rah gayā hai tire shāhkār meñ

ab paḌ chukī hai ḳhuub tamannā kī ḳhū mujhe

tum aa ga.e ho maiñ huuñ magar intizār meñ

tanhā.i-e-safar kī aziyyat hai dil-shikan

ab koī rāhzan hī mile rahguzār meñ

tere sitam pe terī taraf dekh kar huuñ chup

kitnī tavīl baat hai is iḳhtisār meñ

ab ye khulā ki vo bhī mirī justujū meñ the

maiñ jin ko DhūñDhtā thā savād-e-bahār meñ

gul-rang mai bikher ke ruḳh par chale haiñ vo

qaus-e-quzah tulūa huī rahguzār meñ

'shaukat' bichhaḌ gayā huuñ usī qāfile se maiñ

manzil ġhurūb ho ga.ī jis ke ġhubār meñ

ya-rab hai dil mudam kisi iztirar mein

kuchh naqsh rah gaya hai tere shahkar mein

ab paD chuki hai KHub tamanna ki KHu mujhe

tum aa gae ho main hun magar intizar mein

tanhai-e-safar ki aziyyat hai dil-shikan

ab koi rahzan hi mile rahguzar mein

tere sitam pe teri taraf dekh kar hun chup

kitni tawil baat hai is iKHtisar mein

ab ye khula ki wo bhi meri justuju mein the

main jin ko DhunDhta tha sawad-e-bahaar mein

gul-rang mai bikher ke ruKH par chale hain wo

qaus-e-quzah tulua hui rahguzar mein

'shaukat' bichhaD gaya hun usi qafile se main

manzil ghurub ho gai jis ke ghubar mein