ya sabr ho hamin ko us tarf jo na niklen

yā sabr ho hamīñ ko us tarf jo na nikleñ

yā apne ghar se ban ban ye ḳhūb-rū na nikleñ

hotī nahīñ tasallī dil ko hamāre jab tak

do-chār baar us ke kūcha se ho na nikleñ

dil DhūñDhne chale haiñ kūche meñ tere apnā

Darte haiñ aap ko bhī ham vaañ se kho na nikleñ

koī bhī din na guzrā aisā ki us galī se

zaḳhmī ho mubtalā ho jo ek do na nikleñ

dil aur jigar lahū ho āñkhoñ talak to pahuñche

kyā hukm hai ab aage nikleñ kaho na nikleñ

bastī meñ to dil apnā lagtā nahīñ kaho phir

sahrā kī tarf kyūñkar ai nāseho na nikleñ

gar vo naqāb uThā de chehre se to 'hasan' phir

kuchh ġham nahīñ mah-o-mehr aalam meñ go na nikleñ

ya sabr ho hamin ko us tarf jo na niklen

ya apne ghar se ban ban ye KHub-ru na niklen

hoti nahin tasalli dil ko hamare jab tak

do-chaar bar us ke kucha se ho na niklen

dil DhunDhne chale hain kuche mein tere apna

Darte hain aap ko bhi hum wan se kho na niklen

koi bhi din na guzra aisa ki us gali se

zaKHmi ho mubtala ho jo ek do na niklen

dil aur jigar lahu ho aankhon talak to pahunche

kya hukm hai ab aage niklen kaho na niklen

basti mein to dil apna lagta nahin kaho phir

sahra ki tarf kyunkar ai naseho na niklen

gar wo naqab uTha de chehre se to 'hasan' phir

kuchh gham nahin mah-o-mehr aalam mein go na niklen