ya to wo qurb tha ya dur hua jata hun

yā to vo qurb thā yā duur huā jaatā huuñ

ab to apne se bhī mastūr huā jaatā huuñ

sho.ala-e-ishq vo sho.ala hai ki allāh allāh

sadqe is naar ke maiñ nuur huā jaatā huuñ

ālam-e-jabr meñ quvvat kā taḳhayyul thā bahut

ab vo quvvat hai ki majbūr huā jaatā huuñ

ishq kī raah meñ manzil koī khoī hī nahīñ

kyā ḳhabar paas huuñ yā duur huā jaatā huuñ

kis ko samjhā.ūñ tajalli-e-tabassum kā faroġh

barq ye vo hai ki maiñ tuur huā jaatā huuñ

terā har ġham hai tarab-ḳhez tire ġham kī qasam

shiddat-e-dard se masrūr huā jaatā huuñ

kah do tayyār kareñ dār-o-rasan phir se 'bashīr'

ālam-e-kaif maiñ mansūr huā jaatā huuñ

ya to wo qurb tha ya dur hua jata hun

ab to apne se bhi mastur hua jata hun

shoala-e-ishq wo shoala hai ki allah allah

sadqe is nar ke main nur hua jata hun

aalam-e-jabr mein quwwat ka taKHayyul tha bahut

ab wo quwwat hai ki majbur hua jata hun

ishq ki rah mein manzil koi khoi hi nahin

kya KHabar pas hun ya dur hua jata hun

kis ko samjhaun tajalli-e-tabassum ka farogh

barq ye wo hai ki main tur hua jata hun

tera har gham hai tarab-KHez tere gham ki qasam

shiddat-e-dard se masrur hua jata hun

kah do tayyar karen dar-o-rasan phir se 'bashir'

aalam-e-kaif main mansur hua jata hun