yaad aa kar hijr mein taDpa gai achchha hua

yaad aa kar hijr meñ taḌpā ga.ī achchhā huā

ye bhī aanī thī musībat aa ga.ī achchhā huā

jaur par un ko hameñ apnī vafā par naaz thā

baat baḌh kar imtihāñ tak aa ga.ī achchhā huā

dil ko ham taskīn kyā dete vo kis kī māntā

vo nazar ḳhud us ko kuchh samjhā ga.ī achchhā huā

phuul ban kar bhī na mil saktī thī umr-e-jāvedāñ

bin khile dil kī kalī murjhā ga.ī achchhā huā

chaar tinkoñ ke sivā kuchh āshiyāne meñ na thā

barq ab kunj-e-qafas tak aa ga.ī achchhā huā

har ḳhushī ke saath vābasta the ranj-o-fikr bhī

jald un se zindagī uktā ga.ī achchhā huā

tark-e-duniyā hai 'shifā' apnā maqām-e-zindagī

chaar din duniyā hameñ bahlā ga.ī achchhā huā

yaad aa kar hijr mein taDpa gai achchha hua

ye bhi aani thi musibat aa gai achchha hua

jaur par un ko hamein apni wafa par naz tha

baat baDh kar imtihan tak aa gai achchha hua

dil ko hum taskin kya dete wo kis ki manta

wo nazar KHud us ko kuchh samjha gai achchha hua

phul ban kar bhi na mil sakti thi umr-e-jawedan

bin khile dil ki kali murjha gai achchha hua

chaar tinkon ke siwa kuchh aashiyane mein na tha

barq ab kunj-e-qafas tak aa gai achchha hua

har KHushi ke sath wabasta the ranj-o-fikr bhi

jald un se zindagi ukta gai achchha hua

tark-e-duniya hai 'shifa' apna maqam-e-zindagi

chaar din duniya hamein bahla gai achchha hua