yaad aa ke teri hijr mein samjhaegi kis ko

yaad aa ke tirī hijr meñ samjhā.egī kis ko

dil hī nahīñ siine meñ to bahlā.egī kis ko

dam khiñchtā hai kyuuñ aaj ye rag rag se hamārā

kyā jaane idhar dil kī kashish lā.egī kis ko

uThne hī nahīñ detī hai jab yaas biThā kar

phir shauq kī himmat kahīñ le jā.egī kis ko

jab maar hī Daalā hameñ be-tābi-e-dil ne

karvaT shab-e-furqat meñ badalvā.egī kis ko

mar jā.eñge be-maut ġham-e-hijr ke maare

aa.egī to ab zinda ajal pā.egī kis ko

achchhā rahe tasvīr kisī kī mire dil par

kam-baḳht na Thahregā to Thahrā.egī kis ko

kuchh baiTh gayā dil hī yahāñ baiTh ke apnā

ġhairat tirī mahfil se ab uThvā.egī kis ko

is va.ada-ḳhilāfī ne agar jaan hī le lī

phir jhūTī tasallī tirī taḌpā.egī kis ko

kyuuñ leñge 'jalāl' aa ke mire dil meñ vo chuTkī

jhapkegī palak kaahe ko niiñd aa.egī kis ko

yaad aa ke teri hijr mein samjhaegi kis ko

dil hi nahin sine mein to bahlaegi kis ko

dam khinchta hai kyun aaj ye rag rag se hamara

kya jaane idhar dil ki kashish laegi kis ko

uThne hi nahin deti hai jab yas biTha kar

phir shauq ki himmat kahin le jaegi kis ko

jab mar hi Dala hamein be-tabi-e-dil ne

karwaT shab-e-furqat mein badalwaegi kis ko

mar jaenge be-maut gham-e-hijr ke mare

aaegi to ab zinda ajal paegi kis ko

achchha rahe taswir kisi ki mere dil par

kam-baKHt na Thahrega to Thahraegi kis ko

kuchh baiTh gaya dil hi yahan baiTh ke apna

ghairat teri mahfil se ab uThwaegi kis ko

is wada-KHilafi ne agar jaan hi le li

phir jhuTi tasalli teri taDpaegi kis ko

kyun lenge 'jalal' aa ke mere dil mein wo chuTki

jhapkegi palak kahe ko nind aaegi kis ko