یاد آ رہا تھا ذہنی دباؤ کے ساتھ ساتھ

یاد آ رہا تھا ذہنی دباؤ کے ساتھ ساتھ

اک فلم چل رہی تھی تناؤ کے ساتھ ساتھ

یہ اور بات اس کی نظر میں نہ آ سکا

گھاؤ تھا ایک اور بھی گھاؤ کے ساتھ ساتھ

دریا تو اپنی موج میں پھر بھی رواں رہا

ابھرے تھے کچھ بھنور بھی بہاؤ کے ساتھ ساتھ

محفل میں اس کا رات بہت تذکرہ رہا

بیٹھے ہوئے تھے لوگ الاؤ کے ساتھ ساتھ

سوئے ہوئے تھے حکمراں منہ سر لپیٹ کر

بستی اجڑ رہی تھی کٹاؤ کے ساتھ ساتھ

اس سے ندیمؔ اپنا تعلق عجیب تھا

نفرت پنپ رہی تھی لگاؤ کے ساتھ ساتھ