yaad aaegi unhen meri wafa mere baad

yaad aa.egī unheñ merī vafā mere baad

narm goshe unheñ baḳhshegā ḳhudā mere baad

mujh se ābād thī duniyā-e-mohabbat ai dost

har taraf ho ga.ī tārīk fazā mere baad

mahkī mahkī huī rahtī thī har ik phulvārī

baaġh meñ aatī nahīñ bād-e-sabā mere baad

ġhairat-e-husn hai baaqī na hijāb āñkhoñ meñ

khīñch lī kis ne saroñ se ye ridā mere baad

najd vīrān huā qais ke mar jaane se

dasht meñ koī nahīñ ābla-pā mere baad

juuhī bhī khiltī thī āñgan meñ mahakte the gulāb

suunī suunī huī hai ghar kī fazā mere baad

bhuul jā.egā vo sab jabr-o-sitam apne 'jamāl'

vaqt degā use kuchh aisī sazā mere baad

yaad aaegi unhen meri wafa mere baad

narm goshe unhen baKHshega KHuda mere baad

mujh se aabaad thi duniya-e-mohabbat ai dost

har taraf ho gai tarik faza mere baad

mahki mahki hui rahti thi har ek phulwari

bagh mein aati nahin baad-e-saba mere baad

ghairat-e-husn hai baqi na hijab aankhon mein

khinch li kis ne saron se ye rida mere baad

najd viran hua qais ke mar jaane se

dasht mein koi nahin aabla-pa mere baad

juhi bhi khilti thi aangan mein mahakte the gulab

suni suni hui hai ghar ki faza mere baad

bhul jaega wo sab jabr-o-sitam apne 'jamal'

waqt dega use kuchh aisi saza mere baad