yaad aai hai teri saKHt maqam aaya hai

yaad aa.ī hai tirī saḳht maqām aayā hai

dil ke sahrā meñ ye vaqt-e-sar-e-shām aayā hai

ik na.e rang meñ aaj un kā payām aayā hai

ārzūoñ ke liye nām-ba-nām aayā hai

jāñ-ba-lab shauq ke sajde bhī taḌap uTThe haiñ

un ke andāz-e-taġhāful ko salām aayā hai

mere ġham-ḳhāna ke andoh ḳhamoshī kā harīf

kaisī begāna mizājī kā kalām aayā hai

hil rahī hai mire zindān-e-junūñ kī dīvār

phir tasavvur meñ tirā jalva-e-bām aayā hai

anjuman-sāz hai ye rāz-e-mohabbat ai dost

zikr jab aayā tirā bar-sar-e-ām aayā hai

dil-e-betāb kī hasrat ne bikhere sajde

majlis-e-ġhair meñ bhī terā jo naam aayā hai

chashm-e-sāqī meñ jhalaktī hai mirī laġhzish-e-shauq

kāñpte haath se lab tak abhī jaam aayā hai

'aql ko josh-e-junūñ dār-o-rasan tak laayā

'aql vāloñ ke kabhī hosh bhī kaam aayā hai

terī sarkār meñ 'aḳhtar' kī du'ā.eñ giryāñ

dil kā kashkol liye terā ġhulām aayā hai

yaad aai hai teri saKHt maqam aaya hai

dil ke sahra mein ye waqt-e-sar-e-sham aaya hai

ek nae rang mein aaj un ka payam aaya hai

aarzuon ke liye nam-ba-nam aaya hai

jaan-ba-lab shauq ke sajde bhi taDap uTThe hain

un ke andaz-e-taghaful ko salam aaya hai

mere gham-KHana ke andoh KHamoshi ka harif

kaisi begana mizaji ka kalam aaya hai

hil rahi hai mere zindan-e-junun ki diwar

phir tasawwur mein tera jalwa-e-baam aaya hai

anjuman-saz hai ye raaz-e-mohabbat ai dost

zikr jab aaya tera bar-sar-e-am aaya hai

dil-e-betab ki hasrat ne bikhere sajde

majlis-e-ghair mein bhi tera jo nam aaya hai

chashm-e-saqi mein jhalakti hai meri laghzish-e-shauq

kanpte hath se lab tak abhi jam aaya hai

'aql ko josh-e-junun dar-o-rasan tak laya

'aql walon ke kabhi hosh bhi kaam aaya hai

teri sarkar mein 'aKHtar' ki du'aen giryan

dil ka kashkol liye tera ghulam aaya hai