yaad aati hai teri yun mere gham-KHane mein

yaad aatī hai tirī yuuñ mire ġham-ḳhāne meñ

khil uThe jaise gulistāñ kisī vīrāne meñ

apne dil hī meñ makīñ dekhā use ham jis ko

DhūñDte phirte rahe ka.aba-o-but-ḳhāne meñ

dil meñ the shoa.la-fishāñ hasrat-o-armāñ shab-e-ġham

saiñkaḌoñ sham.a farozāñ thiiñ siyah-ḳhāne meñ

the tirī bazm meñ sab jām-ba-kaf ai saaqī

ik hamīñ tishna-dahan the tire maiḳhāne meñ

tīrgī meñ bhī rahā jashn-e-charāġhāñ kā samāñ

barq ke sho.ale farozāñ rahe kāshāne meñ

mire afsāne ko afsāna na samjho yaaro

hai haqīqat hī haqīqat mire afsāne meñ

Daal dī sāqī-e-kausar ne azal se 'rif.at'

bāda-e-ishq-o-mohabbat mire paimāne meñ

yaad aati hai teri yun mere gham-KHane mein

khil uThe jaise gulistan kisi virane mein

apne dil hi mein makin dekha use hum jis ko

DhunDte phirte rahe kaba-o-but-KHane mein

dil mein the shoala-fishan hasrat-o-arman shab-e-gham

sainkaDon shama farozan thin siyah-KHane mein

the teri bazm mein sab jam-ba-kaf ai saqi

ek hamin tishna-dahan the tere maiKHane mein

tirgi mein bhi raha jashn-e-charaghan ka saman

barq ke shoale farozan rahe kashane mein

mere afsane ko afsana na samjho yaro

hai haqiqat hi haqiqat mere afsane mein

Dal di saqi-e-kausar ne azal se 'rifat'

baada-e-ishq-o-mohabbat mere paimane mein