yaad-e-mazi ki meri laghzish-e-pa ho jaise

yād-e-māzī ki mirī laġhzish-e-pā ho jaise

aur ye karb kā ehsās sazā ho jaise

tujh se duurī kisī majzūb kī manfī bāteñ

terā milnā kisī sālik kī duā ho jaise

muddatoñ se hai vahī shab kī masāfat jaarī

kārvāñ samt-e-safar bhuul gayā ho jaise

ab to chehroñ se vo āsār-e-rifāqat bhī ga.e

har koī paikar-e-ehsās-e-anā ho jaise

tohmateñ aisī ki ye soch rahā huuñ ḳhud bhī

umr ke saath mirā qad bhī ghaTā ho jaise

muzmahil sā nazar aatā hai mirā zauq-e-jamāl

vo bhī is dhuup meñ tā-der rahā ho jaise

kab tak āḳhir maiñ chalūñ samt-e-muḳhālif kī taraf

aane vaalā bhī koī ābla-pā ho jaise

merī āñkhoñ kī namī kahne lagī hai koī baat

aa.ina mujh se nazar pher rahā ho jaise

zindagī ab tirā mauzū-e-suḳhan mere yahāñ

ek TuuTā huā paimān-e-vafā ho jaise

kab patā dete haiñ phūloñ ko khilāne vaale

ham samajhte haiñ ki faizān-e-sabā ho jaise

yaad-e-mazi ki meri laghzish-e-pa ho jaise

aur ye karb ka ehsas saza ho jaise

tujh se duri kisi majzub ki manfi baaten

tera milna kisi salik ki dua ho jaise

muddaton se hai wahi shab ki masafat jari

karwan samt-e-safar bhul gaya ho jaise

ab to chehron se wo aasar-e-rifaqat bhi gae

har koi paikar-e-ehsas-e-ana ho jaise

tohmaten aisi ki ye soch raha hun KHud bhi

umr ke sath mera qad bhi ghaTa ho jaise

muzmahil sa nazar aata hai mera zauq-e-jamal

wo bhi is dhup mein ta-der raha ho jaise

kab tak aaKHir main chalun samt-e-muKHalif ki taraf

aane wala bhi koi aabla-pa ho jaise

meri aankhon ki nami kahne lagi hai koi baat

aaina mujh se nazar pher raha ho jaise

zindagi ab tera mauzu-e-suKHan mere yahan

ek TuTa hua paiman-e-wafa ho jaise

kab pata dete hain phulon ko khilane wale

hum samajhte hain ki faizan-e-saba ho jaise