یاد یاراں کو کف دل میں چبھوتے ہوئے ہم

یاد یاراں کو کف دل میں چبھوتے ہوئے ہم

گھر کے کونے میں پڑے رہتے ہیں روتے ہوئے ہم

نیم شب اور یہ آنسو ہیں کہ رکتے ہی نہیں

ہائے پردیس میں تکیوں کو بھگوتے ہوئے ہم

ہر نئی صبح سے امید پذیرائی لئے

چادر خاک کے پردے میں سموتے ہوئے ہم

رات اس بزم میں اک تو ہی شناسا تھا مگر

کتنے تنہا نظر آئے ترے ہوتے ہوئے ہم

مر ہی جائیں گے تری یاد میں یوںہی کسی روز

دکھ کے آنچل میں کہیں شعر پروتے ہوئے ہم

سرسراہٹ سی کہیں زلف گرہ گیر میں تھی

ڈر گئے آج ترے سائے میں سوتے ہوئے ہم